.....
مصر هى الصبح بدرى ..اذان الفجر ومحاولات الاستيقاظ وتحدى الشيطان
والتسبيح بصوت هامس وانت نازل على السلم خوفا من (العو )الذى لا تؤمن بوجودة لكنك تخاف منة
مصر :الناس اللى تنزل من بيوتها بعد قرأن السادسة والنصف لتقف وتقول يا رب
مصر :الولد البرئ الصغير ينام فوق اعلى قمة البرسيم الذى تعب من رصة على العربية الكارو فى الفجرية
مصر :طفل المدرسة الذى تتشاجر معة امة لا يقاظة ثم تتشاجر معة ليأكل الساندوتش
ثم تتشاجر معة ليشرب اللبن فيتشاجر معها لأن ( البقسماط )خلص
وهو يحب ان (يسقى )البقسماط فى اللبن او الشاى ابو لبن
مصر :الارتباط (وبحبك )...اول بوسة ..وجنينة الاورمان ..وكوبرى قصر النيل
و(اشترى الوردة دى منى يا رب تتجوزها )
مصر : القايمة والعفش والاتفاق ..و(هاخدها بشنطة هدومها ) و(احنا بنشترى راجل ) و(واحنا نجهزهالك ونوديها لغاية عندك .......هتكتب المؤخر كام بأة )؟!!!!
مصر : طابور المدرسة وتحية العلم و(بلادى بلادى ) (ومصر يا اول نور فى الدنيا شق ضلام الليل ) ..
مصر : رحلة جنينة الحيوان ..وحديقة الازهر وجنينة الاسماك ..ومتحف الشمع ..والكبريتاج وبانوراما اكتوبر
مصر :السياحة والفسح وركوب الحنطور و(كرباج ورا يا اسطى ) وبمب العيد وسعد نبيها التى هى (سعدنا بيها )..فى اغنية اهلا بالعيد لصفاء ابو السعود ..لأن مفيش نبى اسمة سيدنا سعد
مصر : الصحاب والجدعنة و(الجرى نص الجدعنة واحنا جدعان قوى )و(الندالة لها ناسها )
و(قليل الاصل ما يلزمناش )و (قليل البخت يلاقى العضم فى الكرشة )
مصر :..( المعايرة )و(بطل يا اهبل )و(بريللا بريللا بريلليلا )و (خلاااااويص ...ليييسسسسسسسة)
مصر باكيدج وبسعر الجملة وما ينفعش تحبها بالقطعة
يا تاخدها على بعضها
يا تسيبها كلها
..بحبك يا مصر
